Kosova dhe Shqipëria do të mbajnë mbledhje të përbashkët kuvendare në kuadër të 110-vjetorit të Pavarësisë.
Zëdhënësi i Qeverisë së Kosovës, Përparim Kryeziu, ka treguar se kjo mbledhje do të mbahet për nder të shënimit të 28 nëntorit.
Për këtë ka reaguar dhe Sali Berisha i cili është shprehur se mbledhja e dy Kuvendeve në çdo rrethanë tjetër përveç kësaj, do ishte e mirëpritur.
Berisha vazhdoi me tej duke shtuar se Edi Rama do dëshironte që Kuvendi i Kosovës mblidhej në parlamentin e Serbisë dhe jo të Shqipërisë.
“Natyrisht mbledhja e dy Kuvendeve në çdo rrethanë tjetër përveç kësaj, do ishte e mirëpritur, por unë kam bindjen se Edi Rama do dëshironte që Kuvendi i Kosovës mblidhej në parlamentin e Serbisë dhe jo të Shqipërisë. Me këtë rast i përshëndes deputete e Kosovës por theksoj se në rast se analizojmë Edi Rama dhe vëllai e tij Vucici, ky është një kopje e shëmtuar dhe vasal i Vucicit dhe nuk mund të paraqitet si patriot por përkundrazi si një armik i pavarësisë dhe ardhmërisë së asaj në BE’, shprehet kreu demokrat.
Në qershor të këtij viti, në mbledhjen e dy qeverive, kryeministri shqiptar Edi Rama, propozoi që 28 nëntori t’i bëjë bashkë dy shtetet njëkombëshe, Kosovën dhe Shqipërinë, me një kuvend të përbashkët.
“Unë do t’ju propozoja që, duke qenë se jemi në 110-vjetorin e pavarësisë së Shqipërisë dhe të ngritjes së flamurin të pavarur të Shqipërisë, ne të kishim në nëntor, të parin Kuvend të përbashkët, me të dyja Parlamentet e mbledhura në një dhomë”, u shpreh Rama.
