“Beteja” për shikueshmërinë dhe impaktin në rrjetet sociale është një ndër elementët kryesorë të politikës dhe në Shqipëri kryesuesi i listës është kreu i Partisë Demokratike, Sali Berisha.
Berisha vijon ta lërë pas në renditje rivalin e tij kryesor, kryeministrin dhe kreun e PS Edi Rama.
Kështu ka bërë të ditur drejtuesi i “Terra World”, Blerim Gjeladini teksa diskutohej për politikanët më të ndjekur në rrjetet sociale në emisionin “Debat” në A2 CNN.
“Ne kemi bërë dhe një rankim në rang global, por dhe kombëtar kemi dy periudha, atë së fundmi, se kemi një ngjarje të re që është rikthimi i Berishës, i cili së fundmi është i pari. Ai vazhdon të jetë i pari për klikime në Facebook, pastaj vjen zoti Rama dhe të tjerët. Kemi një matje interesante për primaret që kanë sjellë një aktivizim të opozitës, sidomos në FB që janë më lartë se politikanët e tjerë në Shqipëri“, tha Gjeladini.
Sipas tij në periudhën e fundit personi më i klikuar në rrjetet sociale në Shqipëri është Sali Berisha, i pasuar nga Edi Rama, për të cilin tha se ka një rënie të ndjekjes kjo dhe për shkak të llogarive false që e ndjekin atë.
“Edi Rama është i dyti, por ka një trend negativ, krahasim me reagimin për postime. Trendi është me vetë personin. Mesatarja e reagimit është më e vogël se periudha paraprake. Ne aplikojmë një filtër. Është trend që njerëzit hapin fake-açount, algoritmi ynë i largon ato. Në llogarinë e kryeministrit ka shumë llogari false. Vetëm në gusht janë mbyllur 13 mijë llogari false. Shumë politikanëve iu ka rënë shumë ndjekja pasi kanë thyer rregullat e rrjetit social”, shtoi ai.
