Media britanike Daily Mail ka shkruar një artikull për arrestimin e një të riu shqiptar më 23 tetor të këtij viti i cili kishte udhëtuar me gomone drejt Mbretërisë së Bashkuar.
Djali kishte hyrë në shtëpi menjëherë pasi kishte mbërritur në plazhin e Doverit mes rreth 40 azilkërkuesve me një gomone.
Ai kishte hyrë në banesën e Sue Doyle dhe kishte përdorur celularin e saj për të kontaktuar me një shtetas shqiptar, Rezart Balesin 40 vjeç, i cili jeton pranë Bury, Greater Manchester, dhe është dënuar për konflikte të dhunshme në MB dhe është nën hetim në Shqipëri për pastrim parash prej gati 50,000 £.
Mesazhi i fundit i tij drejtuar 40-vjeçarit Balesi ishte shkruar në shqip: “Mendoj se më gjetën. Më siguro një avokat. Policia ka hyrë në shtëpi.”
Adoleshenti shqiptar i kërkoi më pas britanikes që ta transportonte drejt Londrës ose Mançesterit.
Pas kësaj ngjarje, shtetasja britanike ishte larguar nga shtëpia e saj ku kishte jetuar prej 30 vitesh.
