Kryetarët e katër komunave veriore dhanë dorëheqje dy javë më parë. Për shkak të kësaj, tashmë presidentja Osmani ka përmendur një datë të mundshme për mbajtjen e zgjedhjeve, ndërsa KQZ ka nisur përgatitjet.
Më 18 dhjetor pritet të mbahen zgjedhjet e jashtëzakonshme për kryetarë të komunave të Mitrovicës së Veriut, Leposaviqit, Zubin Potokut e Zveçanit.
Për t’u certifikuar partitë politike afati është hapur më 18 nëntor dhe i njëjti do të mbyllet nesër në orën 16:00.
Deri më tash kërkesën për t’u certifikuar në KQZ e ka paraqitur vetëm një subjekt politike.
Kështu tha të premten zëdhënësi i KQZ-së, Valmir Elezi.
“Deri më sot, në orën 16:00, pra e premte 18 nëntor, KQZ-ja ka pranuar 1 kërkesë për certifikim për pjesëmarrje në zgjedhjet e jashtëzakonshme për kryetar të komunës së Mitrovicës së Veriut. Kjo kërkesë është paraqitur në emër të subjektit politik Iniciativa Qytetare Mitrovica. Pra, ky subjekt politik ka dorëzuar kërkesën për pjesëmarrje vetëm në zgjedhjet e jashtëzakonshme për kryetar të komunës së Mitrovicës së Veriut”, tha ai.
Lista Serbe ka njoftuar se nuk do të marrë pjesë në këto zgjedhje, derisa u është bërë thirrje edhe qytetarëve serbë të mos dalin për të votuar.
