Teksa hyjmë në 10-ditëshin e fundit të muajit Nëntor, duket se temperaturave të larta dhe klimës pranverore që na shoqëroi përgjatë vjeshtës i ka ardhur fundit, teksa moti po shkon drejt përkeqësimit.
Sipas meteorloges Ladja Porja moti po punon për qytetarët, të cilët i druheshin rritjes së çmimit të energjisë për shkak të thatësirës, pasi ky fund muaji parashikohet të mbyllet me 2-fishin e sasisë së reshjeve.
Me shumë gjasë kjo do të ndihmojë në shmangjen e aplikimit të fashëës 800 kËh, të cilën ERE dhe qeveria e kanë shtyrë në këto dy muaj.
Gjithashtu, meteorologia Porja në një intervistë për TCH zbuloi se reshjet e shiut do të jenë të pranishme në mbarë territorin e vendit, deri në mesin e javës tjetër.
“Shira intensivë priten sot gjatë natës dhe pothuajse gjithë dita e diel do të ketë rrebeshe dhe stuhi të forta ere. Reshjet do të jenë të pranishme deri në mesin e javës që vjen. Me përfundimin e këtij episodi që zgjat deri të enjten, kur pritet edhe ndërprerja e reshjeve, do të bien afërsisht në zonat malore rreth 200 milimetra shi më shumë, në zonat qendrore rreth 120 milimetra dhe në zonat jugore 150 milimetra”, tha ajo.
Në vijim ajo shtoi se përveç faktorëve pozitivë në shtimin e reshjeve do të kemi edhe problematika kryesisht në zonat veriore dhe Ultësirën Perëndimore, ku nuk përjashtohen as përmbytje në zona të caktuara.
“Kjo do të bëjë, nëse do të kryenim një analizë mujore, të kemi mesatarisht 2-fishin e reshjeve që duhet të bien, ku më problematike, ose reshje më të dendura priten sërish në zonat veriore duke ndryshuar përfundimisht dhe në mënyrë të menjëhershme dhe situatën në kaskada nga prurjet, kjo edhe për shkak se gjatë gjithë këtyre ditëve reshje të dendura ka patur Mali i Zi, gjë e cila i shërben dhe ushqen zona veri dhe verilindore ku duhet të bien reshjet.
Me ndërprerjen e reshjeve do të kemi edhe mëngjese pak më të ftohta dhe nëse bëjmë një analize, nëntori mbyllet me temperature mesatare shumëvjeçare dhe reshjet jo vetëm bien sa norma, por tejkalohen pothuaj në gjithë territorin shqiptar. Kjo ka dy anë të medaljes.
Së pari reshjet ndryshojnë për mirë situatën në kaskada dhe ndihmojnë Koorporatën Energjitike KESH, por pritet që të kemi përmbytje në disa zona të Ultësirës Perëndimore. Sidomos këto probleme do të raportohen menjëherë pas ditës së diel, për shkak të shirave të dendur“, zbuloi meteorologia.
