Nga Boldnews.al
Në seancat dëgjuese para KLP-së (Këshillit të Lartë të Prokurorisë), Olsian Çela shkoi me ide të qarta, duke premtuar se do ta transformonte mënyrën e funksionimit të Prokurorisë së Përgjithshme. Në fillim mposhti me pikë kandidaten kryesore Arta Marku dhe kjo nuk ishte pak pasi ajo gëzonte “respektin” e madh të mazhorancës, sepse dukshëm ia kishte arritur qëllimit: mos heto zyrtarët e lartë.
Çela shkoi në Parlament i qetë. Më 5 dhjetor 2019 mori 101 vota dhe nga ai moment nisi detyrën si “Workshop-isti” i përhershëm që merr pjesë në çdo seminar, vendas dhe veçanërisht ndërkombëtar ku edhe flet për arritjet e drejtësisë sonë, vështirësitë, apo edhe si mund të përmirësohet sismetimi më mirë. Gjithashtu është korrekt në leximin e mërzitshëm të statistikave vjetore, si një “arkivist” me përvojë të gjatë. Po a mjafton vetëm kaq për kreun e Prorokurorisë Shqiptare?
Nëse do i kthehemi premtimeve këtu e tre vite më parë, Çela preku “zemrat” e shumë shqiptarëve kur deklaroi se kishte shumë të mitur që procedoheshin penalisht me masa esktreme sigurimi “arrest me burg pa afat” dhe këtë situatë do e ndryshonte. Po ashtu foli për format e reja të hetimit që do të vinin para përgjegjësisë personat e përfshirë në korrupsion apo krimin e organizuar.
Po sot ku jemi? Në momentin kur kreu i qeverisë iu hakërrye institucionit të akuzës se po hetonte vetëm “anën e tij, majtas”, isntitucioni i Prokurorisë së Përgjithshme nuk pati asnjë reagim. Është e vërtetë se me reformën e re të drejtësisë kompetencat e kryeprokurorit janë ulur, por sërish mbetet dikasteri kontrollues dhe menaxhues administrativ, kryesisht për prokuroritë e rretheve.
Një laptop (komjuter portativ) bashkë me fjalimet e përgatitura dhe valixhen e gatshme që e le në Aeroportin e Rinasit, e kanë kthyer Çelën si drejtues i një OJF-je ku flitet bukur për projekte të mëdha njësoj si si disa organizata që merrnin fonde për të mësuar fshtarët sesi milet lopa.
Sipas ligjit të reformës në drejtësi, Prokurori i Përgjithshëm nuk ka asnjë të drejtë në hetim. Më konkretisht, ligji nr. 97/2016, i njeh Prokurorit të Përgjithshëm vetëm të drejta Administrative, por kjo nuk e pengon që të jetë nismëtar i ndryshimeve ligjore në Kodin Penal, sidomos për masat shtrënguese të sigurisë për të miturit, apo për vepra të tjera më të lehta penale që në shumicën e rasteve mbyllen me një të rënë çekanit “arrest me burg pa afat”.
Në tentativën e parë që kryeprokurori provoi të kërkonte më shumë kompetenca ia preu hovin ish-drejtuesi I KLP-së Genti Ibrahimi, duke i kujtuar Çelës që të mos merrej me shtim kompetencash, por të shihte sesi prokurorët shqiptarë punojnë në kushte primitive. “Në rast se në fund të mandatit kryeprokurori thotë se kam zgjidhur çështjen e menaxhimit në prokurori, janë punë të mëdha që kërkojë përqëndrim të madh”- i “sugjeroi” Ibrahimi, “flamurtari” i drejtësisë së re që sot lëngon më shumë se e vjetra.
Si një Ministër “pa portofol” që flet kudo në çdo seminar, takim, mbledhje dhe teka ambasadorësh për të bërë propagandën e radhës, Çela duket se gradualisht po e mbylla mandatin pa lënë gjurmë. Ndoshta mund të mbahej mend nëse do linte pas Ëorkshop-et dhe nga “Laptopi shëtitës”, të shkruante pak rreshta që të dënonte sulmin që kryeministri Edi Rama i bëri prokurorëve dhe kërcënuar se nuk duhet të hetonin vetëm në anën e tij, por të hapnin dosje edhe nga krahu tjetër.
Të paktën këtë kompetencë Çela e kishte. Një reagim, jo më shumë. Viti i tretë në detyrë që mbyllet me ecejaken e zakonshme në udhëtimet sa në prokuroritë e rretheve në takimet jashtë vendit dhe pa harruar rolin kryesor: raportimin e mërzitshëm vjetor në Parlament, ku ndodhen jo më shumë se shtatë deputetë me sytë nga telefonët.
