Pesë qytetarë janë proceduar penalisht nga policia, pasi akuzohen se organizuan protestën në Divjakë teksa kundërshtojnë vendosjen e një trau me pagesë nga ana e Ministrisë së Turizmit në hyrje të rrugës që të çon te parku kombëtar Divjakë-Karavasta.
Policia e Ramës ka bërë “të fortin” me protestuesit të cilët shprehen se vendosja e traut është e paligjshme, pasi aktualisht paguajnë taksë për bizneset që kanë brenda parkut dhe tarifa do të ndikojë në çdo aktivitet, nga peshkimi e madje e deri tek jeta e tyre e zakonshme, pasi për të shfrytëzuar plazhet e zonës do të duhet të paguajnë.
Policia njofton se ka nisur hetimi në gjendje të lirë për 5 shtetas, mes të cilëve edhe kreu i Partisë Demokratike në Lushnjë, Eduard Sharka.
“Specialistët për Hetimin e Krimeve të Komisariatit të Policisë Divjakë referuan materialet në Prokurori dhe nisi procedimi në gjendje të lirë për shtetasit: E. Sh., 64 vjeç, J. M., 46 vjeç, N. Gj., 71 vjeç, D. P., 29 vjeç dhe L. Gj., 64 vjeç. Këta shtetas, ditën e djeshme, kanë organizuar një protestë në hyrje të parkut kombëtar të Divjakës dhe nuk u janë bindur thirrjeve të punonjësve të Policisë, për të zhbllokuar rrugën, me qëllim normalizimin e lëvizjes në këtë zone”, njofton policia.
Materialet procedurale i kaluan Prokurorisë pranë Gjykatës së Shkallës Parë Lushnjë, për veprime të mëtejshme.
Banorët e Divjakës kanë protestuar për të pesën ditën rresht e sot teksa janë përplasur me Policinë duke thyer xhamat e kabinës së vendosur në hyrje të parkut kombëtar Divjakë-Karavasta.
Banorët e cilësojnë vjedhje dhe grabitje nga Ministria dhe qeveria shqiptare vendosjen e tarifës për të hyrë në park.
Sipas tyre, vendosja e tarifës është korruoptive dhe dëmton jo vetëm banorët, por edhe bizneset në zonë. Ata theksojnë se do protestojnë deri në arritjen e qëllimit të tyre.
