Ministria e Turizmit dhe Mjedisit që drejtohet nga Mirela Kumbaro ka nisur punimet për vendosjen e një trau elektronik në Parkun Kombëtar Divjakë-Karavasta.
Vendosja e këtij trau ka si qëllim hyrjen me pagesë për turistët dhe vizitorët në parkun kombëtar të Divjakës, por nisja e punimeve ka nxitur reagimin e banorëve të zonës, të cilët prej tre ditësh protestojnë kundër këtij vendimi të ministrisë.
Banorët dhe bizneset e zonës e konsiderojnë një taksë shtesë të panevojshme këtë tarifë të Ministrisë së Mjedisit dhe Turizmit teksa theksojnë se nuk do të ndalen së protestuari.
Për shkak të protestës forca të shumta policie kanë mbërritur në zonë. Policia tentoi fillimisht të hapte rrugën qe ishte bllokuar nga banorët, ndërsa ky episod u bë shkak i tensioneve, që çuan deri në përplasjes fizike.
Banorët, kanë tentuar që të prishin traun ndërsa policia ka ndërhyrë duke i shpërndarë ato dhe ka krijuar një perimetër sigurie.
Sakaq, me pankarta në duar ku shkruhet: “Ndaloni prostitucionin dhe jo ajrin”, banorët e Divjakës replikuan me efektivët duke u kërkuar atyre të mos i provokojnë.
“Mos hyni në gjynah me popullin se e morët në qafë”, apeluan ata.
Të pranishëm në këtë protestë janë edhe Eduard Sharka, kreu i Sindikatës së Fermerëve, njëkohësisht kryetar i PD Lushnje dhe deputetja e Partisë Demokratike Ilda Dhora, e cila më herët ka denoncuar këtë problematikë të qytetarëve.
Sharka shprehet se nëse ky tra do të vendoset qytetarët do bëjnë mosbindje civile.
“Qytetarët e Divjakës janë të vendosur për një mosbindje civile për këtë tra që vendoset në rrugën kombëtare dhe kërkon pagesë për cdo qytetar. Është pa sens, kemi të bëjmë me një rrugë kombëtare. E kanë ruajtur qytetarët e Divjakës në 97 dhe tani ju kërkon pagesë në këtë vend që ia ka dhënë zoti dhe është pronë e gjithë qytetarve të Shqipërisë. Në momentin që nuk ka reagim nga instacat për të marrë argumentin e qytetarëve atëherë ngelet mosbindja civile. Është një rrugë e ngushtë që nuk pranon të ketë ndërtesë sic kanë venë këtë koliben preken interesat e qytetrëve”, ka thënë Sharka.
Edhe më herët banorët kanë kundërshtuar hyrjen me pagesë në parkun e Divjakës, teksa më 2 shtator nisma e Ministrisë së Turizmit u cilësua si një lajthitje dhe nga vetë deputetit socialist i zonës Erion Braçe.
“Po vendosin tra në hyrje të parkut, i pyes më thonë jemi punëtor. U them kush po e bën më thonë ADZM. Edhe këtu tek moli për të bërë fotot e dasmave do të behet me pagesë. Për vendas e të huaj do të duhet të kalohet atje matanë tek trau me pagesë për të bërë xhiro në park. E shikoni ku ka arritur lajthitja në këtë vend?!”, tha Braçe në rrjetet sociale.
Lexo edhe:
“Banorët s’do paguajnë taksë”/ Qeveria tërhiqet pas protestës në parkun e Divjakës
