Është mbyllur pjesa e parë e takimit miqësor mes Shqipërisë dhe Italisë (1-2). Në “Air Albania” kuqezinjtë e nisën në mënyrën më ideale sfidën duke realizuar në minutën e 16-të.
Pas një goditje dënimi Ismajli fluturon mbi mbrojtësit e Italisë dhe me kokë mposht portierin Meret i cili mbetet i palëvizur.
Por duket se ky moment zgjoi kampionët në fuqi të Europës teksa përmbysën shifrat me dy gola në harkun e 5 minutave.
Fillimisht ishte Di Lorenzo në minutën e 20-të që riktheu baraspeshën. Pas një rivënie anësore, mbrojtja kuqezi nuk është e pozicionuar mirë dhe Di Lorenco tund rrjetën.
Në minutën e 25-të Vincenzo Grifo kthen gjithçka në favor të “azurrëve”. Raspadori kalon me lehtësi Kumbullën dhe pason për Grifon i cili i vetëm çon topin në portën e Berishës.
Ndërkohë, në fundin e pjesës së parë, Sandro Tonali pësoi një dëmtim të rëndë në pjesën e qafës duke mbajtur në ankth tifozët italianë dhe ata kuqezinj. Kapiteni i Milanit doli nga fusha me barrelë.
