Kreu i qeverisë Edi Rama, i pyetur për protestën e opozitës që u zhvillua më 12 nëntor, është përgjigjur me ironi, duke thënë ndër të tjera se as nuk i ka parë sesa persona kanë qenë në shesh dhe as nuk i intereson.
Në konferencën e përbashkët me ministren e Ekonomisë, Delina Ibrahimaj, Rama i ka cilësuar protestuesit militantë, duke thënë se nuk kanë lidhje me popullin.
“Për ca proteste më flisni? Për cilët qytetar? Për një protestë partish? Një nongratë dhe një spiun që mbledhin militantët e tyre? S’ka lidhje me popullin, është protestë partish për pushtet, për të prishur e për të marrë, me të vetmin rezultat që hodhën ca bojë këtu që u deshën të punonin punëtorët natën për ta larë… ça proteste?
As nuk di sa ishin, as i kam parë as më interesojnë, mund ta bëjnë çdo ditë po të duan, është një çorbë që e kemi parë prej 30 vitesh që e gatuan i njëjti kuzhinier, një nongrata. Më vjen keq që militantë shkojnë pas atyre që paguhen nga të huajt për të bërë dëm”, tha Rama.
