Protesta e sotme e thirrur nga Partia Demokratike pritet që të jetë me një pjesëmarrje të madhe.
Qytetarët që do të marrin pjesë në protestën e thirrur nga kreu i PD-së Sali Berisha paraditen e kësaj të shtune janë organizuar për të mbërritur në kryeqytet ku prej orës 16:00 mijëra qytetarë do të dalin në sheshin përballë Kryeministrisë për të protestuar kundër qeverisë Rama.
Sipas informacioneve të marra nga kryetarët e degëve të PD-së nga qarku Korçë do të nisen një numër i lartë protestuesish. Nga dega e PD-së Korçë do të nisen mbi 400 protestues të cilët do të jenë të organizuar në 4 autobuza dhe me makina private. Nga dega e PD-së së Devollit janë rreth 400 persona të cilët janë të organizuar me furgona dhe makina private.
Nga dega e PD Maliq janë të konfirmuar 350 persona që do marrin pjesë në protestë dhe nisja do të behet me makina private. Nga dega e PD-së Pogradec kemi afro 400 protestues ku organizimi është bërë me makina të vogla. Dhe nga PD Kolonjë janë rreth 30 persona të cilët po ashtu janë organizuar me mjete të vogla.
Janë afro 1600 protestues të qarkut jug-lindor të cilët do i bashkohen protestës së sotme të thirrur nga kryetari i Partisë Demokratike Sali Berisha.
Kurse sipas informacioneve të fundit nga Vlora do të nisen rreth 200 automjete, të cilat janë regjistruar në zyrat e PD-së, Dega Vlorë. Ata do të nisen drejt Tiranës rreth orës 12:00.
Gjithashtu Edi Paloka ditën e sotme bëri me dije se një grup i madh protestuesish do të vijnë edhe nga Roma drejt Tiranës për të protestuar ndaj keq qeverisjes dhe shpopullimin e vendit.
