Sektori energjetik në vendin tonë është zhytur në krizë totale dhe ditët e fundit Operatori i Shpërndarjes së Energjisë Elektrike ka nisur të bëj “trimëri” duke kryer operacione gjatë natës për të ndaluar vjedhjet e energjisë elektrike.
Shqiptarët çdo ditë ndihen të kërcënuar ku përveç burgut për lidhje të paligjshme të energjisë elektrike, kryeministri Edi Rama në çdo dalje për mediat flet për vendosjen e fashës “800 kWh” të energjisë elektrike (pra 42 lekë kilovat/orë) nga e cila mund të preken mbi 100 mijë familje.
Nga ana tjetër opozita ka denoncuar korrupsionin që sipas saj përfshin qeverinë Rama e cila gjatë stinës së verës shet energji elektrike më lirë, ndërsa në dimër detyrohet që ta blejë “si frëngu pulën” dhe më pas mundohet që fajtorin ta gjejë tek familjet shqiptare të cilat për shkak të krizës së rëndë ekonomike e kanë të pamundur të përballojnë jetesën.
Kontrollet e policisë gjatë natës janë kryer nga Malësia e Madhe në Shkodër deri në fshatrat e thella të Beratit duke verifikuar kabina, matësa dhe linja për objektet që abuzojnë me energjinë.
“Kontrolle NATËN për vjedhje energjie nga Malësia e Madhe në Shkodër deri në fshatrat e thella të Beratit kontrolle dhe verifikime gjatës në kabina, matësa dhe linja për objekte që abuzojnë me energjinë. 8 raste procedimesh nga ekipet e OSSH në polici për vjedhje të energjisë elektrike familjarë dhe biznese për linja të dyta dhe ndërhyrje në matës“, thuhet në njoftim.
- Kriza e thellë dhe borxhet kanë përfshirë sektorin e energjisë në vend
Kriza e energjisë elektrike në Shqipëri ka detyruar kompaninë e shpërndarjes së energjisë OSHEE që të marrë 80 milionë euro overdraft në bankat tregtare vendase. Operatori i Shpërndarjes së Energjisë ka lidhur 8 kontrata kredie me 4 banka për blerjen e energjisë elektrike. Kjo kredi është pjesë e paketës së ndihmës që dha qeveria për sektorin energjetik pas rritjes së çmimeve të energjisë në tregjet botërore.
Në total gjatë pranverës së këtij viti ekzekutivi miratoi një fond 200 milion euro për të garantuar borxhin e OSHEE, me synimin që kredia të kishte risk të ulët pagese dhe interesa të ulëta.
Vetëm për gjysmën e dytë të vitit, OSHEE shpenzoi 228 milion euro për të siguruar energjinë kundrejt një çmimi 206 euro për megavat orë.
