Shtetet e Bashkuara të Amerikës po e shtojnë presionin ndaj qeverisë së Kosovës për të shtyrë me një vit procesin e konvertimit të targave të automjeteve në veriun e banuar nga serbët.
Derek Chollet, këshilltar i lartë në Departamentin Amerikan të Shtetit, deklaroi se në bisedën telefonike të zhvilluar me presidentin serb, Aleksandar Vuçiç, ndau “zhgënjimin me vendimin e Kosovës për të mos zgjatur afatin për regjimin e targave”.
Edhe i dërguari amerikan për Ballkanin Perëndimor, Gabriel Escobar, tha për Zërin e Amerikës se Kosova duhet të përmbushë kërkesat perëndimore për çështjen targave të makinave dhe themelimin e Asociacionit të komunave me shumicë serbe.
Këto qëndrime të ashpra Uashingtoni i mbajti teksa Albin Kurti dhe Vjosa Osmani kishin mbyllur takimin në Pallatin Elize me presidentin francez, Emmanuel Macron. Në një komunikatë të përbashkët të Presidencës dhe Qeverisë së Kosovës theksohet se në takimin me Macron liderët kosovarë kanë shprehur përkushtimin e plotë për procesin e dialogut, të bazuar në ruajtjen e integritetit territorial dhe funksionalitetit të Kosovës, të cilat janë të paprekshme.
Sipas kësaj deklarate, Presidenti Macron theksoi përkrahjen e tij për paqe, siguri dhe stabilitet në Kosovë dhe rajon.
