Një telefonatë ka dhënë alarm për bombë në Gjykatën e Apelit ditën e djeshme, por pas kontrollit të imtësishëm ka rezultuar se është njoftim i rremë.
Ndërkaq këtë të Mërkurë, policia ka bërë të mundur identifikimin e autorit. Dyshohet se shtetasi i cili bëri telefonatën vuan nga probleme të shëndetit mendor.
“Në vijim të veprimeve, nga Drejtoria e Antiterrorit u referuan materialet procedurale në Prokurorinë pranë Gjykatës së Shkallës së Parë Tiranë, për veprën penale “Përhapja e informatave të rreme që ngjallin panik”, për shtetasin J. K., 47 vjeç, i dyshuar me probleme të shëndetit mendor”, njofton policia.
Vijojnë veprimet procedurale, në bashkëpunim me Prokurorinë pranë Gjykatës së Shkallës së Parë Tiranë, për dokumentimin e plotë të kryerjes së veprës penale, identifikimin dhe kapjen e shtetasve të tjerë që dyshohet se kanë nxitur shtetasin J. K., të kryejë telefonatë të rremë në sallën operative, duke përhapur panik dhe duke vënë në alarm shërbimet policore, bëjnë me dije uniformat blu.
