Në Gjermani është duke u zhvilluar sot takimi në kuadër të “Procesit të Berlinit” për Ballkanin Perëndimor, me kancelarin Olaf Scholz që udhëheq samitin, teksa pranë tij qëndron Presidentja e KE, Ursula von der Leyen.
Samiti nisi në orën 09:00, ndërsa përveç gjashtë liderëve të Ballkanit Perëndimor merr pjesë edhe Presidenti i Këshillit Evropian Charles Michel.
Në fjalën e tij, Scholz tha se Evropa është e plotë vetëm me anëtarësimin e Ballkanit, ndërsa kërkoi normalizimin sa më të shpejtë të raporteve Kosovë-Serbi.
Sakaq, ajo çka ra në sy në nisje të takimit ishte fakti se kryeministri i Kosovës, Albin Kurti dhe Edi Rama u ulën në krah të njëri-tjetrit në tryezë dhe shkëmbyen vazhdimisht batuta.
Por, klima e paqtë në dukje mes Ramës dhe Kurtit nuk ishte ajo që mbizotëroi në samit, pasi në një moment kryeministrja serbe Ana Brnabiç i shkon pranë Ramës për ta takuar, por dukshëm shmang kontaktin me sy me Kurtin dhe nuk i jep dorën, duke kthyer shpinën menjëherë pas përshëndetjes me kryeministrin e Shqipërisë.
Pas largimit të saj Rama dhe Kurti nisën të qeshin sërish, ndoshta duke shkëmbyer batuta në shqip për incidentin.
Ndërkohë një tjetër moment i shoqëruar me doza humori dhe të qeshura ishte kur, Rama dhe Kurti thirrën prej së largu kryeministrin tjetër shqiptar që merr pjesë në takim.
Nga të dy u dëgjua të thërrisnin: “O Abaz!”. Teksa Rama e Kurti qeshnin edhe nga krahu tjetër ku ishte ulur Dritan Abazoviç u prit me të qeshura thirrja e tyre.
Sa i përket fotos zyrtre të takimit, Rama dhe Kurti qëndruan në një krah ku ndodhej edhe kryeministri i Maqedonisë së Veriut Dimitar Kovaçeski, ndërsa krerët e BE-së i ndanin nga pjesa tjetër ku ndodhej Dritan Abazoviç dhe Ana Bërnabiç.
