Ish-kandidati për deputet i Partisë Demokratike, Fisnik Qosja ka vendosur të kandidojë në primare për kryetar të Bashkisë Kavajë.
Lajmin e ka bërë të ditur ai vetë përmes një postimi në Facebook ku njofton se ka marrë vendimin për t’u futur në garën për Bashkinë e Kavajës, përmes primareve që do të zhvillohen në Partinë Demokratike.
Ai shkruan se Kavaja është bërë eksperiment i Rilindjes gjatë viteve të fundit dhe rezultati është se sot kemi një Bashki të falimentuar.
Postimi i Fisnik Qosjas në Facebook:
“Të dashur miq!
Banorë të Bashkisë së Kavajës.
Dua të ndaj me ju vendimin që kam marrë për t’u futur në garën për Bashkinë e Kavajës, përmes primareve që do të zhvillohen në Partinë Demokratike.
Situata ku ndodhet sot gjithë vendi, por sidomos Bashkia jonë, është dramatike.
Ndryshimi mund të vijë vetëm me angazhim, vetëm duke u bërë pjesë e përpjekjes për të mos i lënë gjërat në këtë rrokullisje çdo ditë e më keq.
Në këto kushte, unë vendosa të bëhem pjesë e ketij proçesi , të jap kontributin tim, duke hyrë në këtë garë, ku jam i sigurt se do te dalim te gjithe te fituar.
Asgjë nuk do të ndryshojë nëse secili qëndron duke bërë sehir.
E ndjej se mund të shërbej, mund të ndihmoj qytetin tim, ku kam lindur, ku kam familjen, e ku po rris dhe djalin tim. Kam bindjen se mund t’i shërbej me përulësi banorëve të mrekullueshëm të Njësive Administrative Golem, Synej, Luz i vogël dhe Helmas. Dua të jemi zëri i qindra mijëra emigrantëve Kavajas, kudo që ndodhen jashtë vendit, duke krijuar ura të sinqerta bashkëpunimi në interes të zhvillimit dhe prosperitetit të Bashkise sonë.
Përgjegjësive nuk i kam ikur asnjëherë, edhe kur kam qënë më i ri.
Të marrësh sot përgjegjësi për të hyrë në një garë, me synimin për të përmirësuar gjendjen, e për t’i shërbyer qytetarëve, është angazhim fisnik. Unë vetë do ta vlerësoj këtë nisëm tek çdokush.
Ju e dini shumë mirë se çfarë ka ndodhur këto vite me Kavajën. Eshtë bërë eskperimenti më i keq i rilindjes.
U premtua se do të shndërrohej në Venecia me lundrim e me varka, sot kemi një Bashki të falimentuar.
Të falimentuar zyrtarisht. Sepse, një model i dështuar, nuk sjell tjetër përvecse dështimin e radhes“-shkruan Qosja.
