Kryetari i Partisë Demokratike, Sali Berisha tha këtë të Martë se opozita s’mund të pengohet nga asnjë për të fituar zgjedhjet. Komentet i bëri në një prononcim për gazetarët, teksa iu kërkua një reagim për dështimin e negociatave në PD për daljen me një kandidat në zgjedhjet e ardhshme lokale.
“Opozita nuk mund të pengohet nga asnjë për të marrë fitore në këto zgjedhje. Zotërinjtë u ftuan dhe erdhën pa asnjë lloj paragjykimi që të bashkohen nëse duan, të garojnë për çdo post në këto bashki, të paraqisnin kandidatura, ose në përputhje me statutin të krijonin fraksionin. Por ata s’duan as statutin, as primaret dhe as fraksionin”, tha Berisha në prononcimin për gazetarët para se të hynte në selinë blu.
Me çfarë logo do regjistroheni?
“Ai qe prek flamurin e PD i ka bërë hesapet shumë, shumë keq”, theksoi.
Çfarë do të thotë?
“Do ta shihni ditët e ardhshme. Nuk i preket flamuri Partisë Demokratike”, u përgjigj.
Berisha informoi se takimi që do të zhvillojë në selinë blu me kryetarët e degëve të Qarkut të Tiranes, sekretarët e këtyre degëve dhe grupet e punës, lidhet me protestën.
“Statuti i 11 dhjetorit është Kushtetuta e pathyeshme e PD-së së Rithemeluar. Statuti është jashtë çdo lloj kompetence për tu shkelmuar. Ai është dokumenti bazë i PD-së në momentet kur ajo ndodhej përballë alternativës ‘të ishte apo jo’. Është themeli i saj, mbi të cilën është ngritur kjo forcë politike sot, më e fuqishme se kurrë dhe më e fuqishme se çdo forcë politike. Është ky statut që përbën themelet e fitores në zgjedhjet e 14 majit, por para saj leksionet historike që do të marrë çeta e vjedhësve, hajdutëve të Edi Ramës nga qytetarët shqiptarë. Sot unë kam një takim me kryetarët e degëve të PD-së së Tiranës, për të dhënë udhëzimet dhe për të bërë diskutimet për përgatitjet për protestën e jashtëzakonshme. Ju nuk mund ta imagjinoni se sa zien sot në të 4-anët e vendit urrejtja ndaj Edi Ramës dhe bandës së tij”, u shpreh ai.
