Nga Boldnews.al
Në 17 Tetor të këtij viti, 65-vjeçari Sazan D., po mbulonte me llamarina e teneqe të tjera, tarracën e një ndërtesë një-katëshe, të ngritur me blloqe betonu, në tokën e fituar prej tij nga ligji 7501, në zonën e Orikumit.
Ishte ditë e ngrohtë në Vlorë dhe Sazani po mendonte që të mbulonte objektin, para se të nisin shirat e vjeshtës.
Por, pak pasi kishte nisur të ngrinte llamarinat dhe teneqet e tjera mbi çati, në derën e tij mbërritën inspektorët ndërtimorë të Bashkisë.
Ata i thanë se ndërtimi është pa leje. Sazani 65-vjeçar nuk arriti të kuptonte se përse duhej marrë leje për disa llamarina. Ai, me shumë mundësi, do të ketë ndjekur në lajme se në Tiranë, qeveria po “amnistonte” katet pa leje në kullat dhe hotelet në qendër të kryeqytetit.
Por, nuk kishte shumë kohë të mendohej. Shumë shpejt mbërritën në derën e tij të varfër punonjësit e Policisë së Shtetit, të cilët e prangosën.
Akuza zyrtare: “Ndërtim i paligjshëm”.
64-vjeçari deklaroi para oficerëve të Policisë Gjyqësore se “ndërtimin po e bënte në tokën e tij, të cilën deklaron se e ka me çertifikatë pronësie sipas ligjit Nr. 7501, datë 19.07.1991 “Për tokën”. Ai ka shpjeguar se atë pjesë e ka patur të mbuluar me llamarina dhe nuk ka menduar që i duhej leje nga organet kompetente për ta ndërtuar me blloqe”.
Deklarimet e tij, natyrisht, nuk stepën punonjësit e policisë, të cilët i vendosën prangat dhe i dërguar letrat në Prokurori.
Prokuroria, nga ana e saj, u tregua disi më e butë me 65-vjeçarin. Në gjykatë u paraqit kërkesa për caktimin e masës së sigurisë “detyrim për paraqitje”, e cila u miratua nga togat e zeza në 19 Tetor.
Ishte saktësisht e njëjta ditë, kur Këshilli i Rregullimit të Territorit (KRRT), nën drejtimin e Kryeministrit Edi Rama, po merrte vendime për konfiskimin e kateve pa leje në 8 objekte të larta në qendër të Tiranës.
Në listën e ndërtuesve në shkelje të ligjit ishin Armand Lilo i kullës “Syri i Tiranës”, Julian (Lul) Morina, Arben Maloku i Zall-Herrit, vëllezërit indianë Nitin dhe Chetankumar Sandesara, e persona të tjerë, të cilët kanë marrë ndërtimi nga kryebashkiaku Erion Veliaj.
Në këtë listë mungon Pëllumb Salillari, megjithëse vetë dora vetë, Ministri i Brendshëm Bledi Çuçi, e “zuri në flagrancë” me kate pa leje.
Për të gjithë këta bosët e ndërtimit, inspektorët ndërtimorë të Mariglen Qatos nuk panë katet pa leje. Policia e kryeqytetit nuk kishte pranga për t’i vendosur në duart e tyre. Ndërsa Prokuroria e kryeqytetit ka nevojë për ekspertiza të thelluara për të zbuluar katet pa leje, të cilat janë evidente.
Në Tiranë nuk janë aspak efikasë si në Orikum të Vlorës.
Atje, inspektorët ndërtimorë gjetën llamarinat pa leje të 65-vjeçarit, Sazan D. Policia e arrestoi menjëherë, ndërsa prokuroria dhe gjykata caktuan masë sigurimi.
