Kryeministri Edi Rama reagoi për të dhënat e raportit që publikoi Sali Berisha nga “World Justice Project” për Treguesin e Shtetit Ligjor, ku thuhej se Shqipëria renditet në vendin e 87-të, 4 vende poshtë se Vietnami komunist.
Sipas Ramës, raporti i Bashkimit Europian për ecurinë e reformave dhe zhvillimin e vendit, është për të 100% i besueshëm. Sipas tij, Raporti i Progresit që BE solli në Shqipëri një muaj më parë, ishte i realizuar nga një skuadër profesionale.
“Për mua ka vetëm një raport ndërkombëtar të thellë e të besueshëm 100% për ecurinë e vendit: Raporti i Progresit të Shqipërisë nga Bashkimi Europian – fakte jo perceptime, analiza objektive jo gjykime subjektive, skuadër profesionale me kohë të plotë, jo nënkontraktorë part-time”, shkruan Rama.
Ky reagim i Ramës vjen pas akuzave të ditëve të fundit nga opozita për situatën në Shqipëri, si dhe pas disa përplasjeve me deklarata që kryeministri ka pasur me mediat dhe televizionet.
Dokumenti për Shqipërinë ofron një panoramë të plotë të situatës. Ai konsideron se korrupsioni mbetet një shqetësim serioz, ndërsa paralajmëron se nismat për amnistinë fiskale dhe të ashtuquajturat “pasaporta të arta” rrezikojnë të bien ndesh me normat e Bashkimit Europian.
Dokumenti i përvitshëm ofron një panoramë të detajuar të situatës së vendeve që kanë nisur tanimë bisedimet, ato që janë kandidate dhe vendet që synojnë të ndjekin po këtë rrugë.
