Partia e Lirisë ka mbledhur konventën e partisë për të shpalosur programin politik, strategjinë, aksionin, ekipin drejtues dhe mobilizimin kombëtar.
“Një popull që fle në demokraci zgjohet në diktaturë. Referendum është mjeti ynë magjik që ky popull s’ka për të fjetur më. Sfida reale e opozitës nuk ështëm vetëm të denoncojë të keqen por dhe ta mundë”, tha Ilir Meta në fjalën e tij në konventën e Partisë së Lirisë.
Ish presidenti Meta e quajti Partinë që drejton si “alternativë e shpresës”.
“Misioni ynë është ti japim shqiptarëve lirinë e grabitur tinëzisht e me dhunë e tu rikthejmë mundësitë e mohuara. Misioni ynë është që Shqipëria tu përkasë të rinjve. Ne do të bëjmë çdo sakrificë edhe politike për të ndaluar shpopullimin”, tha Meta.
Fajtor për situatën në të cilën ndodhet Shqipëria është qeveria Rama, beson Meta dhe bën thirrje që së bashku me opozitën e bashkuar ti japin fund këtij regjimi.
“Vetëm për shkak të rilindjes qytetarë të pafajshëm e tërinj vriten nga dora e policisë së patronazhistëve dhe askush nuk dënohet apo jep llogari. Jepen pensionet më të ulëta por kemi çmimet më të larta të kosto bazike për çdo familje e taksa më të larta në rajon. Sot qytetarët presin heqjen e prangave dhe shembjen e burgut ku jetojmë dhe ne do ta shëmbim. Ky është borxhi që kemi. Koha nuk pret më. Koha është tani që PL dhe opozita e bashkuar ti japë fund sundimit të regjimit që u ka rrëmbyer liritë tinëzisht shqiptarëve. PL angazhohet solemnisht ti japë fund regjimit për të vendosur sundimin e ligjit”, u shpreh ai.
