Policia ka dhënë informacione të reja për sekuestrimin e një sasie parash prej rreth 500 mijë euro në Portin e Durrësit pasditen e sotme.
Në një njoftim për media policia bën me dije se paratë ishin fshehur në pjesën e sipërme të autobusit të ndara në 6 qese plastmasi në pako të ndryshme. Pas këtij operacioni janë shoqëruar disa persona ndërkohë që po vijon puna për numërimin e saktë të sasisë së eurove.
“Në portin e Durrësit, si rezultat i një hetimi njëmujor të kryer nga Policia Kriminale e DVP Durrës, për mundësinë e futjes së një shume të madhe eurosh në vendin tonë, nëpërmjet portit të Durrësit, gjatë ditës së sotme, në kuadër të operacionit policor të koduar “Eurot”, është ushtruar kontroll i imtësishëm nga Seksioni kundër Krimit Ekonomik dhe Financiar i DVP Durrës.
Si rezultat i informacioneve dhe kontrollit të imtësishëm, në pjesën e sipërme të një autobusi janë gjetur të fshehura 6 qese plastmasi, brenda të cilave kishte disa pako, me rreth 500 000 euro.
Nga Policia e DVP Durrës janë shoqëruar disa persona dhe vijon puna për numërimin e saktë të sasisë së eurove dhe për identifikimin e kapjen e personave të përfshirë. Në përfundim të veprimeve do të japim informacion të plotë”, thuhet në njoftimin e policisë.
