34-vjeçari Indrit Ndoj u gjet i pajetë mëngjesin e sotëm në një kanal në zonën e Fushë Krujës. Trupi i tij i pajetë është gjetur në kanal nga familjarët, teksa këta të fundit kishin dalë për të shkuar në punë.
Mësohet se 34-vjeçari dhe familja e tij nuk raportohet të kenë pasur konflikte me njeri. I riu jetonte vetëm në një shtëpi në fshatin Hasan, ndërsa familja në një banesë në lagjen “Bakushe Visha”.
Familjarët dyshojnë se 34-vjeçari është vrarë në një vend tjetër, por autorët më pas e kanë hedhur në kanalin në lagjen “Bakishe Visha” për të zhdukur gjurmët.
Familjarët nuk pranuan të prononcohen për kamerën, por thanë se Ndoj udhëtonte gjithmonë me biçikletë, e cila nuk ndodhet në vendngjarje.
Ndoj ishte duke vuajtur dënimin për trafikimin e emigrantëve të paligjshëm. Atij i ishte caktuar masa arrest shtëpie për arrestimin e 19 shtatorit të 2021 për trafikimin e emigrantëve të paligjshëm. Në vitin 2021, Ndoj është arrestuar për kalim të paligjshëm të emigrantëve. Ndoj bashkë me një tjetër të ri, Enea Babasi janë kapur duke transportuar 19 emigrantë të paligjshëm drejt vendeve të BE-së, kundrejt pagesës.
Indrit Ndoja është qëlluar nga një distancë e afërt. Plumbi ka prekur arterien femorale, ç’ka ka berë që të ketë pasur hemoragji të menjëhereshme duke i marrë jetën.
Sipas ekspertëve kriminologë të Drejtorisë së Policisë së Durrësit, në vendin e ngjarjes nuk është gjetur asnjë gëzhojë. Kjo ka bërë që hetuesit e ekpertët të mendojnë se autori pasi ka qëlluar ta ketë marrë me vete gëzhojën.
Viktima dhe autori dyshohet të jenë takuar dhe debatuar me njeri-tjetrin.
Policia po ushtron kontrolle në zonë, pasi dyshohet që autori të jetë banor i zonës.
Hetuesit mendojnë se bazuar në faktin që viktima ka marrë vetëm një plumb në këmbë, autori nuk ka pasur qëllim ta vriste.
Policia ka marrë në pyetje mbi 15 persona, mes tyre familjarë apo edhe të dyshuar për ngjarjen si dhe banorë të zonës.
