Deputeti demokrat Gazment Bardhi tha se ka hyrë në negociata për bashkimin e PD me një skenar të qartë, por shprehu skepticizëm lidhur me primaret.
“Kam hyrë në bisedime vetëm me një skenar në kokë, kush po bën teatër e teatër me arsye për të arritur qëllime të tjera do dështojë e do dalë përballë demokratëve si personi që pengoi bashkëpunimin për të mundur Ramën”, tha ai i ftuar në emisionin “Open” në News24.
Primaret brenda PD, i quajti në parim shumë të mira, por shtoi se në praktikë ekziston mundësia të copëtojnë edhe më shumë PD-në.
“Primaret në parim është gjë shumë e mirë por ka pikëpyetjet e veta që duhet të sqarohen. Nëse nuk na çojnë në bashkim por në copëtim më të madh duhet të prevalojë interesi i demokratëve për të mundur Ramën. Gjatë kësaj periudhe kam taklluar individë që kanë menaxhuar primare dhe më kanë sqaruar problematikat”, tha ai.
Bardhi ka zbuluar edhe detaje nga takimi i thirrur sot nga në Kryesinë e Kuvendit nga Alibeaj, me disa deputetë demokratë.
“Disa kolegë mendonin se po vijohet në një linjë tjetër me nisjen e primareve. Kam kërkuar mos dalim në konkluzione”, tha ai.
Më herët gjatë ditës së sotme, Gazment Bardhi dhe Edi Paloka qëndruan në takim kokë më kokë për rreth 90 minuta në një nga lokalet e Tiranës. Qëllimi i bisedimeve mes përfaqësuesve të dy grupeve në PD është dalja me një kandidat të përbashkët në zgjedhjet lokale. Ditët në vijim priten të tjera takime.
Ndërkohë, teksa nga kampi Alibeaj ka skepticizëm për primaret, kreu i PD-së Sali Berisha është shprehur i vendosur për zhvillimin e primareve.
