Kryeministri Edi Rama ka folur për mediat pas mbledhjes së Kryesisë së Partisë Socialiste duke u hedhur në sulm ndaj Vladimir Putin, të cilin e quajti “një diktator”, teksa i faturoi “aventurës së tij luftarake” inflacionin dhe rritjen e çmimeve të shportës së ushqimeve bazë.
Duke mos mbajtur përgjegjësi për politikat që qeveria po ndjek për të lehtësuar sadopak koston e krizës ekonomike në portofolat e xhepat e shqiptarëve, Rama iu rikthye tezës së “armiqve” duke e krahasuar luftën e Rusisë në Ukrainë me tërmetin dhe pandeminë.
“Kemi hyrë në një epokë të kërcënimit të madh, Evropa dhe ne si pjesë e saj jemi të detyruar të përballemi me kërcënimin e madh të kësaj epoke, që vjen si agresion në dyert e Evropës dhe ka sjellë si pasojë veç bombave në Ukrainë edhe rritjen e çmimeve të energjisë dhe produkteve bazë në të gjithë botën, edhe në Shqipëri. është një inflacion lufte, kostoja që i paguajmë aventurës së një diktatori si Vladimir Putin, por nga ana tjetër edhe pse nuk është qeveria që ka sjellë inflacionin i takon qeverisë të ulë peshën e kësaj lufte mbi shpatullat e familjeve”, tha Rama.
Shefi i qeverisë u ndal gjithashtu te çmimi i energjisë duke ripërsëritur edhe njëherë “lutjen” për sa më shumë reshje shiu gjatë këtij dimri, në mënyrë që Shqipëria të mos detyrohet të importojë me çmimin e lartë të bursës.
“Urojmë që të kemi edhe shiun e nevojshëm sepse ne jemi ende shumë të varur nga burimet ujore dhe duke pasur më shumë prurje shiu kemi më pak nevojë për të dalë në import. Sepse edhe nëse do kemi plot e përplot reshje, Shqipëria nuk prodhon për të përballur gjithë atë që harxhon”, shtoi më tej kryeministri.
