Një depo municioni shpërtheu pasi u godit nga bombardimet ukrainase në një fshat në provincën Belgorod të Rusisë, tha guvernatori i saj, Vyacheslav Gladkov.
Kjo krahinë kufizohet me Ukrainën. Gladov sqaroi se ” në bazë të informacioneve të para, nuk ka as të vdekur e as të lënduar “.
Më herët, guvernatori akuzoi ukrainasit për granatimet e një ndërtese apartamentesh në zonë. Një zyrtar ukrainas pretendoi se një raketë ruse “endacake” ishte përgjegjëse për sulmin .
Sipas Gladkov, një shkollë është dëmtuar në një fshat afër kufirit dhe kati i fundit i një ndërtese banimi është goditur gjithashtu.
Këshilltari presidencial ukrainas Mykhailo Podoliak tha në Twitter se Rusia gjuajti një raketë në drejtim të Kharkiv, por ” diçka shkoi keq dhe goditi ” kompleksin e apartamenteve brenda territorit rus.
Një video tregon mbeturinat pranë një pallati 16-katëshe dhe një vrimë të madhe pranë çatisë. Reuters nuk ishte në gjendje të përcaktonte se cila palë ishte përgjegjëse për sulmin.
Gladkov tha se nuk kishte viktima. Guvernatori i një province tjetër ruse, Kursk, tha se një nënstacion u dëmtua nga granatimet, duke lënë dy fshatra pa energji elektrike. Agjencia nuk ishte në gjendje të verifikonte në mënyrë të pavarur këtë informacion.
