Kryeministri Edi Rama ka fluturuar sot drejt Turqisë në bordin e “Air Albania”, ku ka zhvilluar një takim zyrtar me presidentin Recep Tayyip Erdogan.
Mediat turke kanë publikuar edhe video nga takimi që është zhvilluar në orën 14:30.
Ende është e paqartë se çfarë është diskutuar mes Ramës dhe Erdogan, por kjo vizitë surprizë e kryeministrit në Ankara, vjen pas Samitit të Pragës, ku lideri turk u pa disi i veçuar nga krerët e BE-së, ndoshta edhe prej përplasjeve në distancë me homologun e tij grek, Kyriakos Mitsotakis.
Ndërkohë, në Shqipëri vetëm dy javë më parë qeveria vendosi të mbyllë kolegjin turk “Mehmet Akif Ersoy” dhe një kopsht fëmijësh të “Turgut Ozal”, vetëm pak ditë pas nisjes së vitit të ri shkollor.
Pas marrjes së këtyre vendimeve shefi i qeverisë u kritikua gjerësisht si i nënshtruar ndaj tutelës së Erdogan, i cili kishte kërkuar me ngulm prej vitesh goditjen e shkollave dhe institucioneve të tjera private të financuara nga “armiku” i tij Fejtullah Gulen, në Shqipëri.
Sakaq, Shqipëria pritet që të marrë edhe dronë inteligjentë nga Turqia, siç edhe vetë Rama ka bërë me dije së fundmi.
Cumhurbaşkanı @RTErdogan, Arnavutluk Başbakanı Edi Rama’yı Cumhurbaşkanlığı Külliyesinde kabul etti. pic.twitter.com/jR0VZUg59C
— T.C. Cumhurbaşkanlığı (@tcbestepe) October 11, 2022
Dronët “Byraktar Diha” dhe “Bayraktar TB2” janë 2 modelet që po korrin sukses në Ukrainë, përballë ushtrisë së Vladimir Putin dhe ka ndihmuar forcat e Kievit që të godasin objektivat e tyre kryesore.
Ndërkaq, pritet që pas ndalesës në Ankara, Rama t’i drejtohet Strasburgut, ku ditën e nesërme do të jetë prezentë në Këshillin e Europës, ku do të diskutohet lidhur me raportin e Dick Martyt.
