Ish-deputeti i Partisë Demokratike, Klevis Balliu ka hedhur akuza të forta ndaj kryebashkiakut të Tiranës për të cilin thotë se “Pastrimi i parave të Ndragetës dhe aferat korruptive të Erion Veliajt në fushën e ndërtimit, kanë sjellë rritjen më të madhe të çmimeve për apartamente”.
Gjatë një postimi në rrjetet sociale teksa shpërndan shkrimin e “Monitorit”, Balliu thekson se të rinjtë janë detyruar që të jetojnë në një shtëpi së bashku me prindërit pasi e kanë të pamundur të blenë banesë të cilat brenda vitit janë shtrenjtuar me 40%. Sipas Balliut kjo është një ndër arsyet e shpopullimit të paprecedent të Shqipërisë, pasi të rinjtë dhe çiftet e reja janë të detyruar të largohen nga vendi ynë.
Reagimi nga Klevis Balliu:
“VELIAJ ARKITEKT I BREZIT PA SHTËPI
Pastrimi i parave të Ndragetës dhe aferat korruptive të Veliajt në fushën e ndërtimit, kanë sjellë rritjen më të madhe të çmimeve për apartamente në historinë e mbarë botës.
Sot familjet e reja nëse nuk trashëgojnë një shtëpi apo nëse nuk jetojnë në shtëpinë e prindërve mbeten pa shtëpi.
Ndaj sot kemi një brez pa shtëpi dhe pamundësia për të blerë një apartament në Tiranë ka sjellë largimin masiv nga vendit i të rinjve, e sidomos largimin e çifteve të reja.
Erion Veliaj duhet të largohet nga posti që ka vjedhur.
Erion Veliaj është vrasësi i kryeqytetit dhe i shpresës së rinisë shqiptare”, shkruan Balliu.