Sot të dhënat personale të qytetarëve kanë dalë sheshit. Këtë fakt e ka vënë në dukje edhe mjeku i njohur, Erion Dasho, i cili ka publikuar një fotografi të kryeministrit Edi Rama dhe zv.kryeministres, Belinda Balluku në Rinas.
Dasho në mesazhin e tij thekson se para 5 vitesh kryeministri Rama erdhi në pushtet në mënyrë të paprecedent, teksa mori një mandat pa premtime dhe pa program. Sipas tij, kryeministri fitoi “vetëm nëpërmjet një talljeje masive që kombinonte daljen me jamamoto, timonin dhe tepsinë”.
“Para pesë vjetësh, Rama merrte votat e shqiptarëve në një mënyrë të paprecedentë. Pa program, pa premtime, por vetëm nëpërmjet një talljeje masive që kombinonte daljen me jamamoto, timonin dhe tepsinë. Paradoksalisht, arriti të fitojë i vetëm maxhorancën, çka flet më shumë se çdo gjë tjetër për nivelin e respektit që ka për veten e vet votuesi shqiptar. Rezultati është se tashmë na qeveris një shtet ronxho-bonxho, që midis shumë skandaleve të paprecedent, kanxjerrë edhe të gjithë të dhënat e qytetarëve të vet në mexhlis si pasojë e skandalit të e-Albania”, shkruan Dasho.
Më tej mjeku thekson se të dhënat e fundit janë ato të 105 mijë qytetarëve të hetuar për krime të dyshuara.
“Të dhënat e fundit janë ato të 105 mijë qytetarëve të hetuar për krime të dyshuara. Më keq se kaq, zor se mund të ketë. Mirë trushplarët që votuan Ramën kur bënte fushatë me poture, po shqiptarët e tjerë ç’kusur kanë?! (PS nga autori): Kushdo që për shkak të padijes ose indoktrinimit do të përpiqet të japë argumente të tipit “sulme kibernetike ndodhin në gjithë botën”, do të bllokohet”, përfundon Dasho.
