Kryetari i Partisë Demokratike Sali Berisha, ditën e sotme priti në zyrën e tij në selinë blu kreun e sapo zgjedhur të Forumit Rinor, Besart Xhaferri.
Berisha i uroi Xhaferrit suksese në këtë përgjegjësi të re. Në procesin e administruar nga FRPD, garuan 6 kandidatë. Morën pjesë 9470 votues në 62 qendra votimi. Besart Xhaferri u shpall fitues me 5256 vota.
“Te dashur miq, sot prita ne nje takim dhe e urova per zgjedhjen ne postin e kryetarit te FRPD, Besart Xhaferin. Theksova se ridimensionimi i gjithanshem i rolit te te rinjve te FRPD, eshte i nje rendesie jetike per te ardhmen dhe fitoren e Partise Demokratike. Mendoj se gjitheperfshrja e te gjitha flukseve rinore ne FRPD eshte nje kusht kryesor per permbushjen e misionit te ri te FRPD“, shkruan Berisha teksa shpërndan fotografi nga takimi.
Kush është Besart Xhaferri?
Besart Xhaferri ka lindur në Berat. Ai i ka kryer studimet universitare “Economics and Political Sciences”, në një nga shkollat më prestigjize në botë, “London School of Economics”.
Prej vitit 2017 z. Xhaferri ka mbajtur funksionin e Sekretarit për Marrëdhëniet me Jashtë në FRPD. Prej 14 vitesh Xhaferri është sipërmarrës në fushën e arsimit.
Detyrën e re si Kryetar i FRPD-së e sheh si qëllim për prurjen e eksperiencave më të mira ndërkombëtare të fituara nga organizatat partnere, në mënyrë që Forumi të arrijë nivelet më të larta intelektuale në shërbim të Partisë Demokratike dhe së djathtës konservatore.
