Kryetari i PD-së, Sali Berisha paralajmëroi këtë të Hënë publikimin e një dosjeje të re lidhur me financimet ruse. Në replikë me kryeministrin Edi Rama, Berisha iu drejtua: do ta shohë pak Edi Rama se cilin do të gjejë në atë dosje.
Nga foltorja e Kuvendit, Berisha mohoi çdo lidhje të financimeve ruse me Partinë Demokratike. Ai tha se nëse janë marrë para ruse, përgjegjës dhe përfitues është vetëm Lulzim Basha.
Kreu i PD-së ripërsëriti akuzat se ishte Edi Rama ai që ndikoi në mbylljen e dosjes së Lulzim Bashës në prokurori.
Po ashtu, paralajmëroi daljen e një dosjeje të re për financimet ruse dhe ngriti dyshime për përfshirje të kryeministrit Edi Rama.
“Ky (Rama) sulmon opozitën flet për PD dhe financimet. PD nuk ka marrë kurrë asnjë financim rus, nëse i ka marrë i ka marrë Basha. U them se PD u themelua si parti e interesit kombëtar dhe i ka rezistuar rusëve. Rama, njeriu që e dinte se janë financime ruse dhe i deklaroi Bashës në 2018 se ke futur duart në xhepat rus, i mbylli dosjen e për këtë ka fakte. Hetimi është qesharak. PD ka krijuar komision hetimor dhe i kërkon Bashës të tregojë cila është origjina e parave”, tha Berisha.
“Në bllokimin e hetimit të kësaj çështje përgjegjësi kryesore ka Edi Rama, i cili ose e bllokoi për të marrë peng Bashën ose e bllokoi me urdhër të atyre që i kanë dhënë paratë. Ju them një gjë, ekziston një dosje Mitrokhin, të shohë pak Edi Rama se cilin do të gjejë në dosjen Mitrokhin. Do vazhdojë dosja ruse dhe këtu do jemi”, shtoi ai.
