Ish-Presidenti Bujar Nishani, pas lënies së detyrës së kreut të Shtetit, ka rrëfyer vështirësitë si dhe momentet e veçanta. Ai ka folur në Ora News për raportet e Ministrit të Jashtëm Ditmir Bushati, ku ky i fundit ka tentuar disa herë të sfumojë rolin e presidentit.
Hila: Nuk jeni pyetur për ambasadorët, nuk jeni pyetur për politikat e personelit në Ministrinë e Jashtme.
Nishani: Nuk kam pretenduar të ndërhyj në Ministrinë e Jashtme. Ne kemi një ligj të Shërbimit të Jashtëm që përcakton që 5 veta në Shërbimin Diplomatik duhet të marrin titullin ambasador.
Hila: Ka nja 10 vjet që nuk e japin…
Nishani: Sepse këtu nuk ka përgjegjësi ndaj shtetit. Mendon ministri se këto janë dhurata nga xhepi i tij për njerëz të caktuar. Është Presidenti që jep titullin ambasador. Unë kam dhënë vetëm një titull dhe kanë ardhur vetëm dy propozime. U kam thënë të sjellin propozime për 5 vende. Ata nuk mbahen si çokollata për të premtuar njërit apo tjetrit për t’i mbajtur njerëzit lidhur. Është një kulturë e shekullit të kaluar që njerëzit i mban në xhep karrotën por që ta nuhasë kafsha dhe të vij nga mbrapa.
Kam kërkuar që të kaloj ligji në Parlament, janë përcaktuar 5 poste për titullin ambasador, bëni seleksionimet dhe të vijnë 10 propozime. Nuk erdhën kurrë. Erdhën vetëm dy propozime për dy vende. Në këtë rast jo vetëm ka munguar, por injoruar totalisht institucioni i Presidentit, sepse nuk ka ministër që ka këllqe të injorojë institucionin e Presidentit të Republikës, jo Bujar Nishanin, Ilir Metën sot…etj. Presidenti i Republikës është kreu i Shtetit shqiptar. Në momentin që hyn në atë zyrë është kreu i Shtetit shqiptar nuk është më Bujar Nishani, nuk është më Ilir Meta. Ikën nga ajo zyrë kur dhunon Kushtetutën. E ka qartësisht Kushtetuta. Sa kohë është në atë zyrë është Presidenti i Republikës.
Edhe në rastin e ambasadorëve, unë kam bërë një rezistencë të jashtëzakonshme, jo personale. Asnjë ambasador nuk është emëruar gjatë këtyre 5 viteve sa kam unë si President i Republikës, me dëshirën apo kërkesën time si emërtesë e imja. Kam thënë po emërtoj këta, emëroni ju këtë që dua unë. Kam refuzuar të hyj në relata të tilla. Sepse nuk e quaja normale që emërimet e ambasadorëve të bëhet në këtë procedurë, por të kemi një procedurë normale.
Të marri komisioni i Jashtëm atë rol që i ka dhënë ligji, të marri kryeministri atë rol, të marri Presidenti atë rol që i ka dhënë ligji. Ne nuk kemi luksin që të kemi njerëz pa fund në Shërbimin e Jashtëm. I kemi me gishtat e dorës dhe t’i ruajmë. Flas për njerëz me dinjitet. Ç’rëndësi ka se për kë voton tek kutia e votimit ditën e zgjedhjeve. Diplomatët i shërbejnë shtetit. Kanë investuar dhe të investosh në diplomaci nuk është njësoj si të investosh në një fushë tjetër sepse bota e diplomacisë është specifike dhe është imazhi i shtetit.
