Jamarbër Malltezi, anëtar i Këshillit Kombëtar i PD, u shpreh këtë të Enjte se Taulant Balla është një “mashtrues përsëritës”, teksa foli për çështjen e privatizimit të ish-klubit Partizani.
Në emisionin “Drejt”, ai tha se SPAK po bën mirë që po heton dhe shtoi se çështja është marrë nën hetim qysh në vitin 2014 edhe nga Mimi Kodheli dhe “nuk është gjetur asgjë”.
“Taulant Balla është një mashtrues përsëritës dhe është gjetur i tillë me vendim gjykate. Që SPAK heton është gjë shumë e mirë në çdo moment. Unë kam një dokument të vitit 2014, ndërsa Mimi Kodheli ka hetuar ç’të mundet dhe ka marrë dosjet nga Hipoteka. Balla u ftuar dhe u padit për shpifje në gjykatë. U gjet fajtor për shpifje dhe u dënua nga gjykata e Apelit dhe i premtoi një gjyqtari se do t’i paguante kalimin e Vettingut dhe ai e tha se është e drejta e fjalës së lirë të deputetit, me gjëra që nuk i ka thënë në Kuvend”, tha Malltezi.
“Kompleksi i pallateve janë ndërtuar me lejet e 3 kryetarëve të bashkisë, Ramës, Bashës dhe Veliajt. Ndërkohë që është ndërtuar edhe një kopsht nga investitorët dhe është dhuruar për publikun. Më tepër sesa një hakmarrje personale e Ballës, janë lojëra politike për të sfumuar çështjet dhe aferat e qeverisë. Ne kemi 2 muaj që kemi 150 pyetje SPAK-ut për incineratorët. Këtu për të sfumuar këtë, është pjesë e drejtësisë së Sorosit me regji. Duan të godasin Berishën përmes meje, ashtu sikurse kanë bërë para 12 vitesh edhe pse nuk kanë gjetur gjë. Është një lojë politike me drejtësinë e kapur”, shtoi ai.
