Deputeti demokrat Belind Këlliçi, ka reaguar lidhur me arrestimin e bujshëm të mjekut të Traumës.
Përmes një statusi në rrjetin e tij social fb, Këlliçi shkruan se e gjitha kjo ishte një ‘fasadë‘, për të shmagur vëmendjen nga ajo që vërtet duhet luftuar, korrupsioni.
Teksa kujton kriminelët dhe narkotrafikantët që qarkullojnë lirisht në vendin tonë, Këlliçi thotë se Policia e Shtetit, duhet ta ketë vëmendjen tek ata që xhirojnë gomat me makina luksi, e jo të shkojnë me maska në spitale.
Postimi:
Kriminelët mbushin kronikat dhe portalet rozë. Mediat u qepin kostumin e biznesmenit. Policia e Shtetit miope nuk i sheh gjëkundi, ama mjekut në spital i shkojnë me maska. Vunë tellallin dhe shpallën suksesin e rradhës!
Ejani shihni të korruptuarin. Shihni si e luftojmë ne të Rilindjes korrupsionin.
E arrestuan si një narkotrafikant në kërkim prej vitesh, këta, që kthejnë kokën nga ana tjetër kur kriminelët xhirojnë gomat me makina luksi. E kthyen mjekun në tabelë qitjeje, që shqiptarët të harrojnë së paku për një ditë, ç’qeveri llumi e korrupsioni kanë!
