Kryetari i Partisë Demokratike, Sali Berisha kritikoi mënyrën se si po zhvillohet seanca e Parlamentit.
Ai u shpreh se zv.kryeministrja Balluku po mban Parlamentin 20 minuta me mashtrime.
“A mundet një njeri ta mbajë me mashtrime parlamentin 20 minuta duke shkelur çdo rregullore siç bën zonja? Me çfarë lidhet me ju largimi i Nanos, drejtorit të përgjithshëm të policisë? Çfarë lidhje ka? Fol pak këtu për misterin e pallatit të Lul Morinës, na fol pak për mullar pallatin. Pallat 8 katësh dhe flet këtu për mister”, u shpreh Berisha.
Teksa ish-kryeministri fliste, kryetarja e Kuvendit, Lindita Nikolla i hoqi mikrofonin duke thënë se fjala e tij nuk ishte procedurë.
Pak më para Berisha konfirmoi se do të paraqitet në SPAK. I pyetur nga gazetarët nëse do të shkojë për të dëshmuar lidhur me privatizimin e ish-kompleksit “Partizani”, Berisha tha se nuk ka marrë ende fletëthirrje, por nëse do të marrë, do të shkojë.
“Nuk më ka dërguar asnjë fletëthirrje, por i përgjigjem çdo fletëthirrje. Ju do jeni aty të gjithë të bëjmë një konferencë shtypi të shkëlqyer. Përpjekje mjerane e Ramës për të mbuluar vjedhjet, por unë do shkoj gjithmonë sa herë të thërritem. Edhe kur falsiteti noton në detin e falsitetit unë nuk hezitoj kurrë të përgjigjem. Ta keni të qartë!”, tha Berisha.
