Kryetari i Partisë së Lirisë, Ilir Meta ka mbështetur propozimin e Konfindustrisë Shqiptare për rritjen e fashës së konsumit të energjisë elektrike.
Në një reagim në FB, Meta thekson se nevojitet mbështetje për familjet shqiptare, duke shtuar se paratë përfundojnë për inceneratorët dhe tenderat sekretë.
“Mbështes plotësisht propozimin e Konfindustrisë Shqiptare për rritjen e fashës së konsumit të energjisë elektrike, mbi të cilin do të zbatohet pagesa me çmimet e tregut ndërkombëtar për familjarët.
Propozimi për vendosjen e kësaj fashe nga 800Kë në 1200Kë në muaj është plotësisht i drejtë, pasi me fashën e vendosur nga Qeveria preken financiarisht dhe në mënyrë të konsiderueshme rreth 90.000 deri në 130.000 familje shqiptare, kryesisht ato të shtresës së mesme.
Në kushtet e rritjes të çmimeve të naftës, produkteve të shportës dhe çdo shërbimi, është e pavend të rëndohen edhe më tej buxhetet familjare. Është koha për të mbështetur familjet shqiptare dhe jo për t’i zhvatur ato, me para që përfundojnë për inceneratorët, koncensionet dhe tenderat sekretë”, shkruan Meta.
Konfindustria i ka kërkuar ekzekutivit të rishikojë vendimin për kufirin e konsumit të energjisë elektrike mbi të cilën do të zbatohet pagesa me çmimet e tregut ndërkombëtar për familjarët.
Konfindustria vlerëson, se kufiri prej 800kë/muaj konsum i energjisë elektrike në muajt e ftohtë tejkalohet nga jo më pak se 13-20% e familjeve, varësisht ashpërsisë së kushteve të motit.
Kështu në mënyrë të drejtpërdrejtë do të preken të ardhurat e 90-130 mijë familjeve.
