Mes PS e LSI ka humbur edhe qetësia. Ndërsa dashuria u kthye në “tradhëti” kur Edi Rama zgjodhi Lulzim Bashën si partnerin e ri për të mbajtur karrigen e tij në këmbë (lexo poshtë komentin).
LSI po sulmohet si nga PS ashtu edhe nga PD si problemi kryesor që ka vendi.
Edi Rama ka disa ditë që po u thotë qytetarëve se dora e LSI –së në timonin e qeverisë e ka penguar atë të bëjë më shumë sesa ka bërë.
Në të vërtetë ajo që shqiptarët e ndershëm i thonë se ka bërë në këto 4 vjet janë koncesionet qindra milionë dollarëshe që ua ka dhënë klientëve, droga që ka mbjellë në gjithë vendin, trafikantët që rilindën e rinisën të lëvizin si në vitet e errëta të bandave kriminale me makina ministrash e pushtetarësh, aksione selektive të policisë e tatimorëve, kërcënime të hapura ndaj gjyqtarëve që hetojnë aferat qeveritare, mbushje të administratës shtetërore me militantë (shih më poshtë dokumentat e lapsi.al), dështim në dogana e tatime, dështim për të rritur të ardhurat nëpërmjet rritjes së taksave, dështim në reformën në arsim, rritje të tarifave për studentët, etj.
Por Rama po kërkon që gjithë këto minuse në qeverisjen e tij t’ia faturojë LSI –së.
Dhe këtë po e bën më së miri nëpërmjet kanakarëve të tij, siç bën zakonisht.
I drejpërdrejtë për të fajësuar LSI-në si forca që ka vështirësuar reformat dhe të bërit shtet ka qenë sot Saimir Tahiri, ministri që konsiderohet si përgjegjës për kanabizimin e vendit.
‘’Nuk e di a e dëgjuat dje Ilir Metën kur tha se në datë 26 do vihen në radhë për të marrë në telefon Petrit Vasilin. Mesa kuptova ai donte të thoshte që te telefoni Petrit Vasilit do varet nëse Shqipëria do shkojë majtas apo djathtas. Ai ka të gjithë të drejtën të mendojë dhe të besojë që do ndodhë ashtu. Unë mendoj një gjë tjetër: te ai telefoni dhe te vota për LSI-në vështirësohet rruga jonë për Shqipërinë që duam’’, tha Tahiri.
Kësaj here i ka ardhur në ndihmë edhe partneri i ri. Edhe Lulzim Basha
po identifikon LSI –në si parti të pazareve, si e keqja kryesore e vendit. Po e kërcënon me falimentim pas 25 qershorit, njësoj siç bënte deri dje Edi Rama me PD –në.
“Tregtarit të Venedikut i them ta marrë me qetësi dhe dashuri faktin që SHKP e tij do të shkojë drejt falimentimit total më 25 qershor, skllavërimi i votuesve merr fund. “Tregtari i Venedikut” u zgjodh president. SHPK-ja jote do të marrë fund” deklaroi Basha dje në Krujë.
Dashuria e re duket sikur ka lindur mbi inatin për armikun e vjetër. Rama e Basha i kanë ulur tonet me njëri – tjetrin. Si në 2008, PS e PD janë bërë bashkë kundër LSI –së që nuk i lejon të qeverisin të vetëm.
Kryeministri u kujton përditë demokratëe të Bashës nderin që i bëri duke e shpëtuar nga çadra, ndërsa Basha, akuzat më të rënda që ka këto kohë ndaj tij janë për mungesë bilanci në qeverisje apo paralajmërime si ky më i fundit “se do të humbasë si Juventus në finalen e Champions League”.
Për Lulzim Bashën, Edi Rama nuk është më kreu i qeverisë së narkotrafikut, komandanti i Habilajve, nyja gordiane e lidhjes së pushtetit me krimin, shefi i Vilma Nushit të koncesioneve korruptive në shëndetësi, njeriu që do të vidhte e blinte zgjedhjet me paratë e drogës, ai që po kërkonte të asgjësonte opozitën, kryeministri që kërkonte të bënte zgjedhje si monizëm, të diktuara nga krimi dhe nga droga. Të paktën ai nuk e përmend më publikisht si të tillë.
Sot, të gjitha këto akuza mbi të cilën u ngrit kauza e re e Lulzim Bashës, ua kanë lënë vendin sulmeve ndaj LSI, armikut të përbashkët që Rama e Basha gjetën gjatë natës së 18 majit, si kurban për “dashurinë” e lindur mes tyre.
