Deputeti i Partisë Socialiste, Pandeli Majko ka komentuar për herë të parë lajmin e financimit të Partisë Demokratike nga Rusia me 500 mijë dollar, ngjarje kjo e ndodhur në vitin 2017, kur PD drejtohej nga Lulzim Basha.
Nga foltorja e Kuvendit, pas kritikave të PD-së për fondet evropiane, Majko tha se selia blu duhet të dalë e të japë “llogari” për paratë që ka marrë nga rusët.
“Atëherë po flasim këtu për fondet e BE-së, por dje u emetua lajmi se Rusia i ka dhënë PD-së 500 mijë dollarë. Është një lajm i konfirmuar nga administrate amerikane. Tani, ju lutem, mirë do të ishte që kur flasim për fondet europiane të flasim edhe për ato anti-europiane. Ne po flasim për fonde IPA. Por, përpara se t’i kërkoni llogari Beqës sonë, kërkojini llogari Beqës suaj. Ky nuk është një faj individual dhe që mbyllet me idenë se proces gjyqësor nuk ka. Është një akuzë e konfirmuar nga administrata amerikane, dilni këtu dhe jepni llogari”- tha Majko.
I menjëhrshëm ishte përgjigja nga deputeti i PD-së, Enkelejd Alibeaj i cili tha se akuzat e ngritura nga administrata amerikane do të rrëzohet brenda pak orësh. Alibeaj tha se Majko duhet të ishte treguar më i duruar, pasi brenda pak orëve ky lajm do të përgënjeshtrohet, por nuk sqaroi se për çfarë e kishte fjalën.
“Më në fund Majkos i qenka shëruar goja. Jo vetëm për eksperiencën që keni në politikë e për flokët e bardhë, por për gjithçka tjetër, sot duhet të ishit treguar më i duruar. Prit edhe disa orë sepse do të përgënjeshtrohesh. Keni qenë dhe kryeministër, ministër, keni qenë shumë aktiv në politikë për të kuptuar se sot duhet të kishut pasur më shumë durim. Do përgënjeshtrohesh”- tha Alibeaj.
