Policia e Tiranës ka finalizuar një tjetër aksion duke sekuestruar mallra dhe veshje të ndryshme, të dyshuara si kontrabandë.
Policia njofton se është arrestuar drejtuesi i një furgoni që u kap duke transportuar mallrat e dyshuara të kontrabanduara, drejt një dyqani. Shpallet në kërkim pronari i dyqanit që do merrte mallrat, gjithashtu është proceduar penalisht edhe shitësja me iniciale A.Q (44 vjeç).
“Specialistët e Seksionit për Hetimin e Krimit Ekonomik dhe Financiar në DVP Tiranë, në vijim të punës për parandalimin, evidentimin dhe goditjen e veprimtarisë kriminale në fushën e kontrabandës me mallra, bazuar dhe në informacionet e marra në rrugë operative, organizuan dhe finalizuan operacionin policor të koduar “Wares”. Si rezultat i këtij operacioni u bë arrestimi në flagrancë i shtetasit:
– H. B., 59 vjeç, banues në Tiranë.
Shërbimet e Policisë, në afërsi të hyrjes së tregut të Medresesë, kanë lokalizuar dhe ndaluar furgonin me drejtues shtetasin H. B., në të cilin, gjatë kontrollit u gjetën dhe u sekuestruan, në cilësinë e provës materiale, mallra dhe veshje, të dyshuara të kontrabanduara. Nga veprimet hetimore ka rezultuar se këto mallra do t’i merrte shtetasi F. Q., 52 vjeç, pronari i një dyqani, i cili u shpall në kërkim”, njofton policia.
Materialet i kaluan Prokurorisë, për veprime të mëtejshme procedurale.
