Gjykata e Apelit të Tiranës ka bërë me dije se më datë 20 shtator, do të mbahet seanca gjyqësore ndaj efektivit, Jeton Lami.
“Ju bëjmë me dije se, në Gjykatën e Apelit Tiranë është regjistruar çështja penale ( masa sigurimit),me person nën hetim Jeton Lami. Çështja është planifikuar për tu gjykuar me date 20.09.2022 ora 09:50”– thuhet në njoftimin e gjykatës.
Efektivi Lami akuzohet për shpërdorim detyre, pasi shoqëronte Martinajn, me qëllim që ky i fundit t’i shpëtonte aksioneve të Policisë.
Ervis Martinaj është në kërkim ndërkombëtar me urdhër të SPAK, pas dëshmive të të penduarit të drejtësisë, Nuredin Dumani i cili ka thënë se Martinaj e kishte paguar për të vrarë Indrit Doklen.
Ai ka thënë se 500 mijë euro do paguante Ervis Martinaj për këtë vrasje. Vetë Nuredin Dumani ka thënë se ka marrë porosi nga Ervis Martinaj për ta vrarë, ka rënë dakord që Ervisi të jepte për vrasjen e Indritit shumën prej 500 000 Euro dhe se ka marrë paradhënie shumën prej 100 000 Euro.
Kujtojmë se Indri Dokle ka qenë numri 2 i Bandës së Durrësit dhe është i dënuar për “Krijim i organizatës kriminale”, “Vrasja me paramendim”, e kryer në bashkëpunim, e mbetur në tentativë, “Rrëmbimi ose mbajtja peng e personit”, kryer në bashkëpunim, në kuadër të organizatës kriminale.
