Kryetari i Partisë së Lirisë, Ilir Meta ditën e sotme në orën 18:00 ka ftuar qytetarët që t’i bashkohen në një protestë që do të organizohet përpara inceneratorit të Tiranës.
Prej më shumë se një jave, Meta ka bërë thirrje për gjithë qytetarët e Tiranës dhe mbarë Shqipërisë që t’i bashkohen në protestë kundër qeverisë Rama e cila sipas tij është e zhytur “kokë e këmbë” në afera të mëdha korruptive.
Në protestë, kanë deklaruar pjesëmarrjen e tyre pjesa më e madhe e deputetëve demokratë të cilët janë shprehur se është detyrë e opozitës që të protestojnë kundër kryeministrit Edi Rama dhe qeverisë së tij.
Pasi hoqi kostumin e presidentit, që prej 25 korrikut, Meta mori drejtimin e Partisë së Lirisë dhe filloi të bëjë opozitë duke dalë në terren ndërsa janë shpeshtuar edhe konferencat e shtypit me gazetarët ku pothuajse çdo ditë ka denoncuar aferën korruptive të inceneratorëve dhe po ashtu shkelje të tjera të kryera nga ana e qeverisë.
