Kryeministri Rama ka prezantuar këtë të Enjte paketën e dytë sociale që pas rritjes së çmimeve.
Një ndër masat është rritja në 34 mijë lekë e pagës minimale, nga 32 mijë lekë që është aktualisht.
“Paketa e re e rezistencës sociale për të parën herë riindekson pensionet brenda të njëjtit vit me normën e re të inflacionit, duke e çuar në 9.5% indeksimin vjetor. Rrit me 10% mbështetjen mujore për ndihmën ekonomike dhe e dyfishon atë për gratë kryefamiljare me 2 fëmijë. Indekson me 7.5% pagesat për Aftësinë e Kufizuar dhe rrit mbështetjen financiare për energjinë elektrike për të verbërit, paraplegjikët e tetraplegjikët. Rrit përsëri pagën minimale në 34 mijë lekë dhe sjell rritje pagash për administratën, Policinë e Shtetit dhe Policinë e Burgjeve”, tha Rama në një komunikim për mediat.
Po ashtu, ai shtoi se do vijojë mbështetja financiare për naftën pa taksa për fermerët, mbështetja e peshkatarëve për TVSH e naftës, mbështetja e mëtejshme për transportin publik. Rama tha se paketa garanton mbrojtjen nga rritja e çmimit të energjisë elektrike për familjarët dhe biznesin e vogël.
Duke u ndaluar te energjia, Rama tha se kush familje harxhon më shumë se 800 kilovator, do të paguajë energjinë me çmimin e tregut.
“Jemi i vetmi vend që ka marrë vendim të prerë për të mos e prekur çmimin e energjisë për familjarët. Kemi mbi 90% konsumatorë familjarë që konsumojnë më pak se 800 kWh dhe kemi një numër konsumatorësh rreth 6 ose 7% që konsumojnë më shumë se 800 kËh,. Flasim për konsumatorë familjarë me vila, pishina, me oborr të madh, ndriçim dekorativ për të cilët nuk mund të paguajë më buxheti i shtetit dhe taksapaguesit. Çdo kWmbi 800 do të paguhet me çmimin e tregut. Me këtë synojmë një presion për të ulur konsumin e tepërt në kushte krize. Sikundër e kemi përsëritur disa herë”, tha Rama.
Opozita ka hedhur shpesh akuza ndaj qeverisë për paketa të pamjaftueshme për ti ardhur në ndihmë qytetarëve të prekur nga rritja e çmimeve.
