Kryeministri Edi Rama i ka kërkuar përmes një letre kryeprokurorit Adriatik Llalla, që të verifikojë ‘pastërtinë’ e grupin parlamentar të PS-së.
Në kuadër të ligjit të Dekriminalizimit, Rama i kërkon që të marrë në konsideratë këtë kërkesë për të kryer verifikimet e të gjitha të dhënave të deklaruara nga deputetët e PS dhe të dërgojë një përgjigje përpara 29 prillit, ditës kur në KQZ do të dorëzohet zyrtarisht lista me emrat e kandidatëve për deputetë.
Mësohet se fshesa e këtij ‘vettingu’ surprizues do të kalojë mbi gjithë deputetët aktualë e të rinj të PS. Mësohet gjithashtu se ky ‘vetting’ ka edhe një “prokuror” tjetër në selinë rozë: Gramoz Ruçin.
Ky i fundit do të paraqesë në kryesi raportin e kontributeve politike të deputetëve, pjesëmarrjen e tyre në mbledhjet e grupit parlamentar, në seancat e Kuvendit dhe të komisioneve parlamentare; praninë e tyre pranë bazës socialiste dhe elektoratit; si edhe ecurinë e deklaratave të tyre të pasurisë gjatë këtij mandati qeverisës.
