Kryetari i Partisë së Lirisë Ilir Meta ka komentuar largimin e të rinjve nga vendi, fenomen i cili është shtuar me hapa galopantë muajt e fundit.
Përmes një postmi në rrjetin e tij social fb, Meta ka shpërndarë historinë e dy vëllezërve binjakë, student të ekselencës, të cilët pas përfundimit të studimeve do të ikin jashtë vendit.
Reagimi i plotë i kreut të PL-së, Ilir Meta:
Historia e vëllezërve binjakë, studentë të ekselencës, Mario dhe Xhulio Popa është sa mbresëlënëse, po aq dhe trishtuese. Fitues absolutë në degën e Mjekësisë në Universitetin e Tiranës, ata thonë se pas përfundimit të studimeve të ardhmen e tyre e mendojnë jashtë vendit.
Si vëllezërit Popa janë me mijëra të rinj në Shqipëri, që në mungesë të shpresës këtu, bëjnë përpjekje çdo ditë për t’u larguar.
Të frenojmë ikjen e të rinjve tanë më të talentuar duke ju krijuar kushte dhe mundësi më të mira për arsimim dhe punësim, që të shprehin potencialet e vërteta dhe të ndërtojnë të ardhmen e tyre në vend.
Shqipëria ka diell për të gjithë!
