Punonjës së IKMT-së janë vendosur sërish mëngjesin e kësaj të Shtune në agjentet e “Prestige Resort” në Golem, ku po vijon shembja e një prej pishinave të resortit.
Aksioni nisi që prej mëngjesit të djeshëm dhe nga përfaqësuesit e biznesit, që është në pronësi të “Hysenbelliu Group”, u cilësua i jashtëligjshëm dhe një hakmarrje politike e Edi Ramës. Përfaqësues të “Hysenbelliu Group” thanë se aksioni erdhi pasi iu refuzua që mediat nën pronësi të këtij grupi (Panorama, News 24, Balkanweb) të ndiqnin një politikë editoriale në përputhje me interesat e kryeministrit.
Aksioni vjen në një kohë kur një numër i konsiderueshëm turistësh janë në resort, e shumë prej tyre kanë shprehur për mediat pakënaqësinë për aksionin, duke vënë në dukje se nuk duhet të ndodhte gjatë sezonit.
Nga ana tjetër, Ministria e Brendshme deklaroi përmes një njoftimi zyrtar se aksioni erdhi “për rikthimin e rreth 4 mijë metrave katrorë rërë e det të kthyera në beton, përpara një resorti ku një pjesë e zhvillimeve edhe në brendësi të zonës së pishave janë ndërtime të paligjshme”.
Aksionin e IKMT e dënoi dhe opozita. Kryetari i PD-së Sali Berisha e cilësoi një sulm antiligjor dhe përpjekje për të shkatërruar një grup mediatik. Kreu i Partisë së Lirisë, Ilir Meta tha se është një akt terrorist ndaj medias së lirë, lirisë së pronës dhe sipërmarrjes.
