Armando Broja ka firmosur një kontratë të re afatgjatë me Chelsean deri në vitin 2028. Lajmin e ka konfirmuar vetë klubi londinez në rrjetet sociale.
Sulmuesi shqiptar, i cili mbush 21 vjeç në fund të këtij muaji, pas nënshkrimit të kontratës deklaroi se kjo është një ëndërr e bërë realitet dhe që luan për klubin për të cilin ka bërë tifo gjatë gjithë fëmijërisë.
“Më mungojnë fjalët vetëm duke menduar për këtë. Është klubi që kam ëndërruar të luaj gjatë gjithë jetës sime, klubi që unë mbështes dhe klubi që dua. Unë kam qenë këtu që kur kam qenë djalë i vogël, kështu që është një ndjenjë surreale për mua dhe familjen time.
“Të vesh fanellën blu me ekipin e parë është një ëndërr e bërë realitet. Është e mahnitshme çdo minutë që luaj në fushë, sepse ky është një nga klubet më të mëdha në botë. Gjithmonë ka konkurrencë dhe të gjithë duan të luajnë, kështu që unë jam i lumtur që kam mundësinë të jem pjesë e saj. Shpresoj që të luaj shumë ndeshje dhe të jem pjesë e suksesit të ekipit.’ – ka thënë Broja.
A new deal for Armando Broja! ✍️🔵
— Chelsea FC (@ChelseaFC) September 2, 2022
