Nga Boldnews.al
Nëse do të kishte ndodhur në Berlin që në një eveniment kulturor të shfaqeshin simbole të nazizmit, kryebashkiaku i atij qytetai më së paku do kërkonte falje deri në përulje. Nuk do kishte asnjë mundësi që këtë “ironi” qoftë edhe me çmenduri artistiko-idiotiske ta fshihte duke treguar edhe arrogancë. Por jemi në kodrat e Liqenit Artificial të Tiranës, aty ku shtëpia “publike” e piolitikës me veshje pushteti e përdor për të vrarë edhe më shumë shtresat e të përndjekurve.
Shfaqja e flamurit me yllin komunist u justifikua nga kryebashkiaku i Tiranës si një simbolikë artistike e vendosur nga grupit nga Prishtina “asgjë sikur dielli”. Nuk është hera e parë që incidente të tilla burojnë qëllimshëm nga mendjet djallëzore të Rilindjes që po rilindin simbolet e komunizmit. Mu bash në mes të Tiranës në oborrin e vilave qeveritare janë vendosur monumentet e Stalinit dhe Leninit, bashkë me një automjet “gaz 69” që përdorej shpesh nga ish-sigurimi i shtetit për të rrëmbyer kundërshtarët e sistemit, ku i priste plumbi, litari apo burgimi i gjatë.
Arroganca e kreut të bashkisë së Tiranës ishte aq e madhe saqë jo vetëm nuk kërkoi falje për shfaqjen e simboleve të komunizmit, por akuzoi se kushdo që mendonte ndryshe është i prapambetur dhe nuk e kuptoka ironinë artistike. Hapja e b… duke treguar pushtetin që të shtyp edhe me një harbim muzikor kapërcen kufirin normal të një shteti demokratik, i cili me ligj ka ndaluar shfaqjen e simboleve komuniste apo programeve politike që kanë elementë të komunizmit.
Sa mijëra qytetarë janë ndjerë të fyer dhe vrarë në shpirt kur në mënyrë publike propagandohet komunizmi, qoftë ai edhe i fshehur pas një gjoja “arti fin” që vetëm mendjet haluçinative mund ta kuptojnë. Kreun e bashkisë së kryeqytetit nuk e justifikon as qëndrimi se paraqitja e simbolit komunist ishte pjesë e performancës së grupit “asgjë sikur dielli” nga Kosova.
Po sikur një grup rroku, rrepi, apo i këngëve popullore të shfaqte në Prishtinë elementë të nacionalizmit ekstrem serb si do të ishte reagimi? Me të drejtë qytetarët atje do të mbanin qëndrim të ashpër, pa pyetur nëse ishte “ironi artstistike”, sigurisht as kreu i komunës së Prishtinës nuk do të hapej b… me sulme sikurse ndodhi në Tiranë.
Edhe pse mund të ketë plot mendime se nuk mund të hiqen paralelizma të tilla, sërish faktet vrasin rrenën Rilindase dhe tregojnë të vërtetën e hidhur. Sistemi komunist në Shqipëri vrau mbi 6500 shqiptarë dhe borgosi dhe internoi mbi 30 mijë, mes tyre gra dhe fëmijë që lindën nëpër kampet dhe burgjet e ngritura nga sistemi i cili sot ka në krye pinjollët e veshur si për “demokraci”, por pa shkulur rrënjët nga totalitarizmi.
Sado që kreu i bashkisë apo drejtues të qeverisë ta minimizojnë ngjarjen ajo ishte e rëndë, por akoma më i rëndë mbetet reagimi i cili është i denjë për një ish-sekretar të rinisë që bën karrierë duke përdhosur kujtimet e hidhura të një prej diktaturave më të egra të Europës Lindore.
