Një foto e bërë sot në protestën e PD-së, tregon deputetin demokrat Gent Strazimir me pistoletë në brez. Arma është zbuluar ndërsa Strazimiri përleshej me policinë dhe i është ngritur xhupi.
Vetë deputeti nuk mohon faktin që ishte me armë në protestë por justifikohet me rastin e deputetit socialist, Armando Prenga që sipas tij qëlloi dhe plagosi me armë brenda komisariatit. Madje sipas tij, Prenga as nuk u filmua me armë brenda policisë.
Megjithatë Boldnews.al publikon disa foto të cilat vërtetojnë se personi në fjalë është Gent Strazimiri.
Deputeti demokrat ka reaguar edhe nëpërmjet një deklaratë të shpërndarë për mediat duke thënë se arma e vetme është denoncimi dhe përballja me këtë bandë kriminale.
“Me armë në mënyrë krejt të paligjshme, me numra identifikimi të hequra qëllimisht, sot ishte ajo që nuk mund të quhet më “Policia e Shtetit”, dhe jo Gent Strazimiri! Arma e Gent Strazimirit nuk mbahet në brez! Arma e vetme e Gent Strazimirit, është dhe do të jetë ajo që ka qenë gjithmonë: denoncimi e përballja pa kompromis me këtë bandë kriminale që po sundon me urdhra kriminelësh e jo me ligje!”- thotë ai.
