Banorët e Himarës dhe përfaqësues të minoritetit grek kanë dalë në protestë pasditen e së shtunës, kundër vendimit të Këshillit të Ministrave për shpalljen e parkut detar të bregut dhe të Gjirit të Porto Palermos në Bashkinë e Himarës si “Park Natyror” i kategorisë IV, duke e cilësuar “grabitje”.
Një grup qytetarësh në protestë e cilësuan si gjenocid të hapur kundër popullit të Himarës.
Këtu është politika e zhvatjes, qeveria ndjek një politikë antipopullore dhe antidemokratike dhe qeverisë shpejt a vonë do t’i vijë fundi.
Ne duhet të jemi të bashkuar dhe të kemi një qëllim, pronat dhe problemet që na shqetësojnë prek gjithë popullsinë e Himarës, pavarësisht ngjyrës politike. Të gjithë prekemi njësoj.
Gjithçka pasi në vendim përveç detit, përcaktohet si zonë e mbrojtur edhe një sipërfaqe prej 204 hektarë tokë, e cila thuhet se u përket banorëve autokton himariotë, pjesëtarë të minoritetit etnik grek të Shqipërisë.
Organizata Omonia e cila është nismëtare e protestës deklaron se shteti shqiptar në mënyrë të paarsyeshme nuk ka dhënë tituj pronësie në zonën e Himarës ende pas 31 vitesh nga rënia e sistemit komunist, duke vendosur kështu nën një regjim të veçantë pengu pronën private, raporton MCN Tv.
Në qëndrim thuhet se ky vendimi i ri finalizon gjendjen aktuale të ndalimit të regjistrimit të pronave. Me këto të dhën , shpallja e zonës së sipërcituar si “e mbrojtur” privon çdo mundësi jo vetëm për zhvillim dhe shfrytëzim por edhe mundësinë për shpërblim, kompensim që do të mund kërkonin ligjërisht pronarët në qoftë se do të posedonin tituj pronësie, që në bazë të ligjit të, nuk kanë për të poseduar kurrë për sipërfaqen në fjalë.
Në protestë u tha se pas metodave manipuluese të “investitorëve strategjikë”, shfaqet një metodë dhe strategji e re për rrëmbimin e pronave të paluajtshme duke paraqitur si vegël këtë radhë gjoja mbrojtjen e ambientit.
Protestuesit i bënë thirrje qeverisë shqiptare t’i tërheqë këto ligje dhe të sqarojë synimet e saj ndaj himariotëve, duke paralajmëruar se do i drejtohen Komisionit Europian dhe do të dërgojë ankesat përkatëse pranë Gjykatës Europiane për të Drejtat e Njeriut.
