Pas ngjarjes së rëndë në Potam të Himarës, Policia e Shtetit njoftoi përjashtimin nga radhët e saj të oficerit Arjan Tase.
Veç kësaj, në njoftimin pasardhës thuhej se u shkarkua i gjithë zinxhiri komandues i Drejtorisë Vendore për Kufirin dhe Migracionin në Vlorë dhe personat përgjegjës për moszbatimin e masave shtesë për parandalimin e ngjarjeve të tilla.
Por, në të vërtetë, asnjëri prej oficerëve të këtij zinxhiri nuk është shkarkuar, edhe pse policia e përdor diçka të tillë mediatikisht.
Të 15 oficerët e komisarët janë pezulluar nga detyra pas nisjes së hetimeve dhe jo shkarkuar, çka do të thotë ata janë ende pjesë e Policisë së Shtetit.
Është e vërtetë që aludimet mbi përgjegjësinë nuk mund të jenë të gjitha mbi këto efektivë, por vendimi i Drejtorit të Përgjithshëm nuk është shkarkimi, por pezullimi deri në përfundim të hetimeve.
E njëjta histori ka ndodhur dhe më parë, ndërsa deklaratat në atë kohë për shkarkime erdhën dhe për incidentin e ndodhur me grupin e xhirimit të televizionit A2 CNN dhe gazetares Anila Hoxha. Në atë kohë, një efektiv shtyu kameramanin Endrit Aga dhe gazetaren, ndërsa Agjencia e Mbikëqyrjes Policore nisi hetimet.
Pas disa ditësh pezullim në të vërtetë dhe deklaratave mediatike për shkarkim, tashmë efektivi jo vetëm që është në radhët e organizatës, por ka ngjitur shkallët e policisë në një tjetër sektor. /A2
Njoftimi i Policisë së Shtetit ku thuhej se ishte shkarkuar zinxhiri drejtues i Policise Kufitare Vlore:
