Në protestën e organizuar nga shoqëria civile pasditen e së enjtes, ku u kërkua drejtësi për vrasjen në bregun e detit të 7-vjeçares Jonada Avdia nga një skaf që drejtohej nga komisari i policisë, Arjan Tase, gjithashtu iu dha një ultimatum Edi Ramës për të shkarkuar ministrat Bledi Çuçi dhe Mirela Kumbaro, nëse ato nuk do të dorëhiqen.
Me shumë gjasa Edi Rama nuk do të shkarkojë ministrat e tij, të cilët konsiderohen si përgjegjës për atë se çfarë ndodhi në Potam të Himarës, mesditën e 2 gushtit.
Nesër, në orën 19:30 është paralajmëruar mbajtja e një tjetër proteste, e cila do të mbështetet edhe nga opozita, ndërsa nuk dihet nëse Sali Berisha, kreu i PD, dhe Ilir Meta, i Partisë së Lirisë, do të jenë ose jo në shesh, ashtu sikundër ndodhi të enjten. Megjithatë drejtuesit e dy partive opozitare kanë konfirmuar mbështetjen e plotë ndaj reagimit qytetar.
Por cila është strategjia që do të përdoret në kushtet kur Rama nuk do të largojë ministrat, apo këta të fundit nuk do të dorëhiqen?
Nga raportimet mësohet se pas skadimit të ultimatumit, do të ketë protesta të vazhdueshme, deri në largimin e Çuçit e Kumbaros nga postet qeveritare.
Gjatë ditës së hënë, ashtu si edhe të enjten, protestuesit do të mblidhen në orën 19:30 para godinës së Ministrisë së Brendshme, për të marshuar më pas drejt Kryeministrisë, dhe ndoshta edhe Presidencës.
Më 2 gusht, komisari Arjan Tase përplasi për vdekje një 7-vjeçare, teksa kryente manovra të rrezikshme me skaf.
Ai ishte efektiv policie dhe u përjashtua nga rradhët e policisë nga Drejtori i Përgjithshëm, Gledis Nano.
